Paeci mentira que angunus
jechin por tierra lo nuestru,
estu que mienta la genti
que es patrimoñu estremeñu.
Drentu d’aquellas raizis
que mos hizierun un puebru,
deviamus de defendel
el abla de aquellus tiempus
que mos truxerun del norti
los pastoris i cabrerus
asturianus i leonesis,
que jecharun a esti suelu
la hondura i la simienti
d’esti puebru duru i reziu.
Paeci mentira que angunus
jechin por tierra lo nuestru.
Esti mou del palral
que tuvun nuestrus agüelus
que es patrimoñu i coltura,
tesoru de nuestru puebru
que ai que cudia-lu de siempri,
defende-lu i protege-lu,
lo mesmu que las costumbris,
pinturas i decumentus,
arroyus, montis i ríus,
escritus i menumentus.
I assin devemus palral,
con muchu ergullu i sin mieu
i sabel que ablandu assina
(dezí-lu huerti i de reziu),
no es palral mal castellanu,
es palral bien estremeñu.
No hay comentarios:
Publicar un comentario